Аки башёд бэртлийн улмаас зодоглож чадаагүй Их аварга Хакүхо М.Даваажаргал эх орондоо ирж амрангаа биеэ эмчлүүлнэ.
Зүүн өвдгөндөө бэртэлтэй удсан аварга өнгөрсөн долдугаар сарын башёгийн үеэр баруун хөлийн эрхий хуруундаа нэмж бэртэл авсан нь зуны тойргийн барилдааны үеэр сэдэрч, түүнийг өрсөлдөгчтэйгөө бус гэмтэлтэйгээ барилдахад хүргэсэн байлаа.
Барилдах байтугай гишгэхэд хүндрэлтэй байсан ч тойргийн барилдаанд оролцож явсан Хакүход эмч нар бэлтгэлээ түр зогсоохоор барахгүй энэ сарын тэмцээнийг өнжиж, яаралтай мэс засалд орохыг сануулснаар есдүгээр сарын 08-ны өдөр их аварга энэ тухайгаа албан ёсоор мэдэгдэж, эмнэлэгт хэвтсэн юм.
Есдүгээр сарын 12-нд аварга мэс засалд орсон бөгөөд түүнээс хойш Японд хагалгааны дараах нөхөн сэргээх эмчилгээ хийлгэжээ.
Хакүхо нөгөөдөр Монголд ирнэ. Их аварга долоо хоногийн хугацаатай нутагтаа амарч, энэ хугацаанд Сүмогийн холбооны дүрмийн дагуу ямар нэгэн олон нийтийн арга хэмжээнд оролцохгүй амарч, эмчлүүлээд буцах юм байна.
Эх сурвалж: www.news.mn